انتهى مولد الثانوية العامة لعام 2008 / 2009 ، وحتى اللي جابوا مجموع 98 % مافيش أمل يدخلوا كليات القمة لان الوزير أطلق تصريح جديد بأن العدد محدود وبذلك قضى على احلام الطلاب والطالبات المتفوقين و اللي طلعت عينهم من كتر المذاكرة واصابهم وأصاب اهاليهم بحالة احباط ونقمة على البلد وعلى التعليم صعب يشفوا منها بسهولة بعد عذاب السنين اللي فاتت اللي قضوها في المذاكرة والكد والتعب ومصاريف المدارس و الكتب و الدروس الخصوصية وبهدلتها .
كل اب وام بيحلموا ان ابنائهم يكونوا أفضل منهم وبيعدوا الابن من الطفولة انه يلتحق بكلية مشرفة ممكن تكفل له حياة كريمة ولكن كل الاحلام الوردية بعد 13سنة دراسة أصبحت بتتكسر على صخرة المجموع الخرافي و العدد المحدود في الكليات . البعض بيقول ماهو مش معقول مصر كلها تبقى دكاترة ومهندسين وصيادلة ، وانا بقول وفيها ايه اما يبقى شباب مصر كلهم في أعلى المناصب حتى لو فاضوا عن سوق العمل ؟ دول يعتبروا ثروة قومية ممكن تتصدر لاي دولة ، رغم ان عندنا نقص في كافة المجالات ، و البطالة اللي عندنا مجرد سوء توزيع للعمالة . صحيح مصر بتحتاج وبقوة للمهارات والعمالة الفنية و الحرفية لكن نظرة المجتمع لهذه الفئة بيجعلها تحجم عن الدراسة في الكليات الفنية بالاضافة الى ان المرتبات غير مجزية و نوعية الدراسة لا تؤهلهم بصورة جيدة للخوض في سوق العمل ..وتبقى الخبرة في هذا المجال ولو كانت بدون دراسة هي الافضل في الوقت الحالي.
الطلبة المتفوقين اللي حصلوا على مجاميع فوق الـ 90% ولم يستطيعوا تحقيق احلامهم في الالتحاق بكليات القمة , وماديات اولياء امورهم لا تسمح بالحاقهم بكليات خاصة ، يا ترى هيعملوا ايه ؟ نفسيتهم حتكون شكلها ايه ؟ احساسهم تجاه بلدهم حيكون ايه ؟ ولاءهم لمصر حيكون قد ايه ؟ ذكاءهم ممكن يتوجه ازاي ؟ اذا انقلبوا على مصر او على النظام هل من حقنا اننا نلومهم ؟ دول لو طلبوا من اسرائيل انها تعلمهم على حسابها هتعلمهم ... والحدق يفهم ..قبل ما يندم.
