أكيد أغلبكم عارف ايه هو التايم شير وللي مش عارف نقوله انه نظام مشاركة الاجازة بالوقت
سامعة حد بيقول
يعني ايه ؟
حشرح أكتر
يعني تشتري اسبوع اجازة لاسرتك في منتجع سياحي لمدة معينة غالبا بتكون من 25 الى 30 سنة
ولو مُت لا قدر الله الاسبوع دا بيورث
وهو نظام معمول به عالميا
و ممكن الاسبوع اللي اشتريته في قرية سياحية معينة في بلدك يُستبدل بأي قرية سياحية في العالم
بس لازم تحجز اسبوعك دا قبلها بشهر وفي بعض الاحيان شهرين او تلاتة
وممكن الاسبوع يبقى اسبوعين بس تعمل حسابك انك مش هتصيف السنة اللي وراها لانك بتاخد من رصيدك بتاع السنة اللي بعدها
ودا بيكون كويس للي مسافر اوروبا ...لانه مش معقول حيسافر سنتين ورا بعض ...تذاكر الطيران غالية
طيب النظام دا كويس ولا مش كويس ؟
هو كويس في معظم دول العالم الا مصر
ليه ؟
لان الشركات اللي بتتعاقد معاها أغلبها نصابة
بيحرصوا انهم يعملوا للعميل مقالب وفخاخ في عقودهم
* مثلا يضعوا مصاريف صيانة سنوية للمنتجع باهظة لا ينتبه لها المشتري
فتكتشف انك انت وغيرك من العملاء اللي بتصرفوا على القرية والشركة مش بتتحمل اى حاجة
طيب اذا قلنا مش مشكلة
ما يبقى انت كدا دفعت نص تمن اقامتك اسبوع في اى اوتيل
* وممكن الشركة تبيعلك قرية مازالت تحت الانشاء بتتعمل بفلوسك وفلوس غيرك
و تتفاجىء بمواصفات كتير مش عاجباك او مخالفة للي الشركة وعدتك بيها
و ممكن بعد كدا تلاقي نظام الخدمة والنظافة مش قد كدا
تيجي تطلب اسبوعك في قرية تانية أفضل من قريتك يقولك ادفع الفرق
والفرق بيكون هو نفس السعر اللي كان ممكن تاخد بيه الغرفة وانت مش مرتبط بنظام التايم شير
* وفي احتمال ان القرية اما تطلع حلوة يرتفع تمنها تلاقيهم يقرفوك علشان تفسخ العقد
ويبيعوا حصتك بسعر اعلى لزبون آخر
* اما أكبر مقلب هو انك تيجي تطلب اسبوعك قبلها بشهر يقولك مافيش مكان
يعني يعذبوك آخر عذاب و يضيعوا عليك الاجازة
اما طرق اصطياد زبون التايم شير فدايما فيها ابداع يحسدوا عليه
في كل مكان سياحي يقف عدد كبير من المندوبين لهذه الشركات يحاولوا اغراءك بكافة الوسائل
علشان تحضر الاجتماع اللي حيشرحولك فيه مميزات التايم شير ويصطادوك فيه ويدبسوك
وهما بيسموا الاجتماع دا حفلة علشان اغراءك
يعني يقولك انت معزوم على حفلة تعارف حنقدملك فيها مشروبات
و دعوات اجازة مجانية ، هدايا ، تخفيضات 50% لبعض المحلات والاماكن
انت خسران ايه ؟
ادفع بس 20 جنيه علشان نحجز لك مكان وحتستردهم ع الباب اول ما توصل
الحقيقة هما بيردوا العشرين جنيه علشان تثق فيهم
اما فيما عدا هذا فاغلبه نصب
ايه اللي فكرني بموضوع التايم شير
في رحلتي الاخيرة لشرم الشيخ تعرضت لهذا النوع من النصب
ما كانتش المرة الاولى ولا التانية ولا التالتة هههههههههههههه
كل مرة بقع في نفس الفخ
لكن الحمد لله مش بشتري حاجة رغم ان فيه صعوبة كبيرة ان الزبون يفلت
والسبب انهم بيقدموا عرضهم المغري على انك تشتري في نفس اللحظة
لان السعر حيزيد عشر اضعاف لو خرجت من عندهم مش شاري في التو واللحظة
وكمان هيحرموك من ميزة التقسيط والهدايا و العز كله
وعلى فكرة بيشترطوا دايما من مكرهم ان يكون معاك زوجتك واولادك
في الاجتماع اللي بيوضبولك فيه الفخ
ليه ؟
علشان اولادك وزوجتك يشبطوا ويزنوا عليك
ياعيني حتوقع على كل حاجة وانت تحت تأثير الزن والنصب والوعود المعسولة
وفي الاخر تدفع مبلغ محترم مش اقل من خمسين ألف جنيه
احتمال كبير انهم يروحوا عليك خالص ..واحتمال تستفيد بيهم
انت وحظك و حسب الشركة اللي وقعت فيها
على اي حال انا بحذركم من التايم شير
علشان تدعولي
